ရခိုင်အမျိုးသားပါတီမှ ခွဲထွက်ပါတီသစ် မူဝါဒရေးဆွဲရေး လုပ်ငန်းစဉ်များ ဒီဇင်ဘာတွင် စတင်မည်

By Admin | Posted on November 10, 2016 | Also posted in News, North Rakhine, Politics, South Rakhine | | Tagged , , |

1235 Views

rndp-and-ald-before-anp

 

ရန်ကုန်၊ နိုဝင်ဘာ ၁၀ ရက်။ ရခိုင်အမျိုးသားပါတီ ANP မှ ခွဲထွက်လာသည့် ပါတီထိပ်သီးခေါင်းဆောင်များ အနေနှင့် ပါတီသစ် မူဝါဒရေးဆွဲရေး လုပ်ငန်းစဉ်များကို လာမည့် ဒီဇင်ဘာလတွင် စတင်ရေးဆွဲရန် စီစဉ်နေကြောင်း  ပါတီသစ် တည်ထောင်ရေး ဦးဆောင်ကော်မတီ အဖွဲ့ ပြောရေး ဆိုခွင့်ရှိသူ ဦးမျိုးကျော်က ပြောသည်။

“ ဦးဆောင်ကော်မတီဝင်တွေ ပြန်တွေ့မှာပါ။ ကော်မတီ ဆိုတာကလည်း ကျောက်တော်ကနေ ရွေးချယ်ခဲ့တဲ့သူတွေ။ ခု ပါတီရဲ့ မူဝါဒ၊ တာဝန်ခွဲဝေမှုအပိုင်းတွေ စီမံခန့်ခွဲမှုတွေကို ဒီဇင်ဘာလ အတွင်းမှာ တွေ့ပြီး ဆွေးနွေးမှာပါ။”

လာမည့် အစည်းအဝေးကို ရခိုင်ပြည်နယ်၊ တောင်ပိုင်းမှ မြို့နယ်တစ်ခုတွင် ကျင်းပပြုလုပ်မည်ဖြစ်ပြီး ပါတီသစ်၏ အမည်ကိုပါ ဆုံးဖြတ်သွားမည် ဖြစ်သည်။

အောက်တိုဘာလ ၈ ရက်နေ့မှ ၉ ရက်နေ့ထိ ရခိုင်ပြည်နယ်၊ ကျောက်တော်မြို့နယ်တွင် ပြုလုပ်ခဲ့သော “ရခိုင်ပြည်နိုင်ငံရေး ပြန်လည် သုံးသပ်ခြင်း အစည်းအဝေး” မှ ရခိုင်အမျိုးသား အကျိုးစီးပွားကို ရှေးရှုပြီး ရခိုင်အမျိုးသား ညီညွတ်ရေးကို ဆောင်ရွက်နိုင်ရန် သီးခြား ပါတီတစ်ခု ထူထောင်မည်ဖြစ်ကြောင်း ဆုံးဖြတ်ခဲ့ကြသည်။

ထို အစည်းအဝေးကို ရခိုင်အမျိုးသားပါတီ ဗဟိုအလုပ်အမှုဆောင် အဖွဲ့ဝင်ဟောင်များ၊ နိုင်ငံရေး တက်ကြွလှုပ်ရှားသူများ၊ အရပ်ဖက်ခေါင်းဆောင်များ စုစုပေါင်း ၂၀၀ ခန့်က တက်ရောက်ခဲ့ပြီး ပါတီသစ် ဖွဲ့စည်းရန် ရခိုင်ပြည်နယ် မြို့နယ် (၁၅) ခုမှ ကိုယ်စားပြု (၁၁) ဦး ပါဝင်သည့် ဦးဆောင်ကော်မတီတရပ်ကို ဖွဲ့စည်းခဲ့ပြီး ယခုအခါ ဦးဆောင်ကော်မတီဝင် အင်အား ၃၀ ကျော်ခန့် ရှိပြီဟု ဦးမျိုးကျော်က ပြောသည်။

ရခိုင်အမျိုးသားပါတီသည် ဥက္ကဌ ဒေါက်တာ ဦးအေးမောင် ဦးဆောင်သော ရခိုင်တိုင်းရင်းသားများ တိုးတက်ရေးပါတီ RNDP နှင့် ဥက္ကဌ ဦးအေးသာအောင် ဦးဆောင်သော ရခိုင်ဒီမိုကရေစီ အဖွဲ့ချူပ် ALD တို့ကို ပေါင်းစည်း ထားခြင်းဖြစ်ပြီး ယခု ပါတီသစ်ကို ထူထောင်သူများသည် ALD အင်အားစုများဖြစ်သည်။

ဓာတ်ပုံ – ရခိုင်အမျိုးသားပါတီအဖြစ် ပူးပေါင်းရန် ပြင်ဆင်နေစဉ်က နှစ်ဘက်သောပါတီခေါင်းဆောင်များကို ၂၀၁၃ ခုနှစ် ဇွန်လက တွေ့ရစဉ်။

Related Post

Comments

comments

Root Agency