ကျောက်တော် စိုက်ပျိုးရေးသိပ္ပံမှ သက်မွေးကြောင်းဖွံ့ဖြိုးမှုနှင့် အလုပ်အကိုင် ဖန်တီးမှုဆိုင်ရာ အလုပ်ရုံဆွေးနွေးပွဲပြုလုပ်

By မင်းမျိုးနွယ် | Posted on March 2, 2017 | Also posted in Business, News, North Rakhine | | Tagged , , , , |

441 Views

_DSC0110
ကျောက်တော်၊ မတ် ၂ ရက်။ ရခိုင်ပြည်နယ်အတွင်း စိုက်ပျိုးရေးလုပ်ငန်းဖွံ့ဖြိုး တိုးတက်လာစေရေးအတွက် ကျောက်တော် စိုက်ပျိုးရေးသိပ္ပံကျောင်းတွင် သက်မွေး ဝမ်းကြောင်း ဖွံ့ဖြိုးမှုနှင့် အလုပ်အကိုင် ဖန်တီးမှုဆိုင်ရာ အလုပ်ရုံဆွေးနွေးပွဲတစ်ရပ်ကို မတ်လ ၂ ရက်နေ့ တွင် ပြုလုပ်လျှက်ရှိသည်။

အဆိုပါဆွေးနွေးပွဲကို ရခိုင်ပြည်နယ်အတွင်း မြို့နယ်ပေါင်းစုံမှ တောင်သူများ၊ စိုက်ပျိုး မွေးမြူရေးဌာန အရာရှိအဆင့် တာဝန် ရှိသူများ၊ မွေးမြူရေးနှင့် ရေ လုပ်ငန်းရှင်များ၊ ထောက်ပံ့ကူညီရေးအဖွဲ့များ၊ နိုင်ငံတကာ အဖွဲ့အစည်းများနှင့် ပြည်တွင်းပြည်ပမှ စိုက်ပျိုးရေးပညာရှင် ၁၀ ဦးတို့ တက်ရောက်ခဲ့ပြီး ရခိုင်ပြည်နယ်၏ သက်မွေးဝမ်းကြောင်း ဖွံ့ဖြိုးမှုနှင့် အလုပ်အကိုင် ကဏ္ဍအတွက် ဆွေးနွေးခဲ့ကြသည်။

“အဓိကကတော့ တောင်သူတွေ စိုက်ပျိုးရေး၊ မွေးမြူရေးလုပ်ငန်းတွေမှာ နည်းပညာတွေ တိုးတက်လာရေးအတွက် ရည်ရွယ်ပြီးတော့ လုပ်တာဖြစ်ပါတယ်။ စိုက်ပျိုးရေး လုပ်ငန်းတွေမှာ တိုးတက်တဲ့ ထုတ်လုပ်မှုအပိုင်းတွေကို ရရှိလာအောင် အတွက်ပါ။ နောက်ပြီးတော့ ဆန်စပါးအဖွဲ့အစည်းတွေ၊ မွေးမြူရေး အဖွဲ့အစည်းတွေနဲ့ ပေါင်းစပ်ပြီးတော့ စိုက်ပျိုးထုတ်လုပ်ရေး အပိုင်းကို လုပ်ကိုင်သွားဖို့အတွက် ဆွေးနွေး နေတာဖြစ်ပါတယ်။”ဟု အခွန်၊ ဘဏ္ဍာ၊ လယ်ယာ စိုက်ပျိုးရေးနှင့် ဆည်မြောင်းဝန်ကြီး ဦးကျော်အေးသိန်းကပြောသည်။

လက်ရှိရခိုင်ပြည်နယ်အတွင်း စိုက်ပျိုးရေးကဏ္ဍတွင် အသုံးပြုလျှက်ရှိနေသည့် သမားရိုးကျစိုက်ပျိုးထုတ်လုပ်မှု နည်းစနစ်များမှာ မြေဆီလွှာနှင့် သီးနှံထွက်ရှိမှု အပိုင်းကို ထိခိုက်နေသည့်နည်းစနစ်ဖြစ်သဖြင့် ကောင်းမွန်သည့် ခေတ်မှီ နည်းစနစ်များကို အသုံးပြုစိုက်ပျိုးဖို့ရန်နှင့် မြေဆီလွှာပျက်စီးမှုများကို ကာကွယ်နိုင် သည့်နည်းလမ်းများကို ကျင့်သုံးလုပ်ကိုင်ရန် လိုအပ်ကြောင်း စိုက်ပျိုးရေးပညာရှင် ဦးသိန်းဆုက ပြောသည်။

_DSC0089

 

“စိုက်ပျိုးရေးလုပ်ငန်းအတွက် တောင်သူတွေနဲ့ အခုလိုဆွေးနွေးတာကတော့ ကောင်းပါတယ်။ ပညာရှင်တွေရှင်းပြတဲ့ အပိုင်းမှာလည်းပဲ ကျွန်တော်တို့ လိုအပ်နေ တဲ့ နည်းပညာ လိုအပ်ချက်တွေ၊ မျိုးစေ့သစ်တွေ၊ အရင်းအနှီးတွေကို ပံ့ပိုးကူ ညီပေးနိုင်မယ်ဆိုရင်တော့ လယ်ယာကဏ္ဍက တကယ်ဖွံ့ဖြိုးလာမှာပါ။ ဒါပေမဲ့ အကောင်အထည်ဖော်တဲ့ အပိုင်းမှာ မူတည်ပါတယ်။”ဟု ကျောက်တော်မြို့မှာ တောင်သူ ဦးမောင်ကျော်သာကပြောသည်။

ယင်းသို့ ဖွံ့ဖြိုးမှုနောက်ကျနေသည့် ရခိုင်ပြည်နယ်အတွင်းမှ စိုက်ပျိုးရေးလုပ်ငန်းများ ကို နိုင်ငံတကာနည်းပညာများဖြင့် စိုက်ပျိုးလုပ်ကိုင်ပြီး ထွက်ရှိလာသည့် ကုန်ကြမ်း များကို ပြည်တွင်းဈေးကွက်အပြင် နိုင်ငံတကာ ဈေးကွက်များသို့ပါ တင်ပို့ရောင်း ချနိုင်အောင် ဆောင်ရွက်သွားမည်ဖြစ်ကြောင်း လယ်/ဆည် ဝန်ကြီး ဦးကျော်အေးသိန်း ကပြောသည်။

ယင်းအပြင် လက်ရှိအခြေအနေတွင် စိုက်ပျိုးရေးယန္တရားတစ်ခုလုံး ရင်ဆိုင်နေကြရ သည့် လုပ်သားရှားပါးမှုများကြောင့် စိုက်ပျိုးစရိတ်မြင့်မားမှုများ၊ အခြားစရိတ်စက မြင့်မားနေမှုများကိုပါ လျှော့ချထုတ်လုပ်နိုင်သည့် နည်းလမ်းများကိုလည်း အသုံးပြုသွားမည်ဖြစ်ကြောင်း သိရသည်။

————–

ဓါတ်ပုံ – မင်းမျိုးနွယ်/ RiA

မင်းမျိုးနွယ်သည် ၂၀၀၈ ခုနှစ်မှ စတင်ကာ 7 Day News သတင်းဂျာနယ်၊ Flower News တို့တွင် အလွတ်တန်း သတင်းထောက်အဖြစ် လုပ်ခဲ့ပြီး Favourite သတင်းဂျာနယ်နှင့် ထိုင်းနိုင်ငံအခြေစိုက် Arakan Review အင်လိုင်း သတင်းဌာန၌ လက်ထောက် အယ်ဒီတာအဖြစ် လုပ်ကိုင်ခဲ့သည်။

၂၀၁၃ ခုနှစ်တွင် အာရှအလင်းဂျာနယ်၊ Street Views သတင်းဂျာနယ်တို့တွင် သတင်းထောက်အဖြစ် လုပ်ကိုင်ခဲ့ပြီး သဘာဝသယံဇာတ၊ ရေအရင်းအမြစ်၊ သစ်တောနှင့် နယ်စပ်စီးပွားရေးသတင်းများကို ရေးသားခဲ့သည်။

Related Post

Comments

comments

Root Agency