AA တပ်ဖွဲ့နေ့ ကျင်းပခဲ့မှုတွင် ဖမ်းဆီးခံရသူများ လွတ်မြောက်ရေး စီစဉ်သူများအား သတိပေး

By Admin | Posted on April 20, 2017 | Also posted in News, North Rakhine, Uncategorized | | Tagged , , , , , |

2356 Views

Mra Tazune

မြောက်ဦး၊ ဧပြီ ၂၀ ရက်။ မြန်မာအစိုးရနှင့် ငြိမ်းချမ်းရေးဆွေးနွေးနိုင်ရန် ကြိုးပမ်းလျှက်ရှိသော ရခိုင်လက်နက်ကိုင် တပ်ဖွဲ့ AA ၏ ၈ နှစ်မြောက် တပ်အခမ်းအနားအား ကျင်းပပြုလုပ်ခဲ့သည့် မြောက်ဦးမြို့မှ မြတန်ဆောင်ဘုန်းတော်ကြီး ကျောင်း၏ လက်ရှိကျောင်းထိုင် ဆရာတော်အပါအဝင် ဘုန်းတော်ကြီးကျောင်းတွင် နေထိုင်သူများအား ယနေ့ညနေက  မြောက်ဦးမြို့နယ် ရဲတပ်ဖွဲ့နှင့် သာသနာရေး ဝန်ကြီးဌာတို့ လာရောက်သတိပေးမှုများ ပြုလုပ်ခဲ့ကြောင်း သိရသည်။

“ဒီနေ့ ကျွန်တော်တို့ အဲဒီဘုန်းတော်ကြီးကျောင်းကို သွားရောက်ပြီးတော့ သတိပေးမှုတချို့ပြုလုပ်ခဲ့တာ ဟုတ်ပါ တယ်။”ဟု ရခိုင်ပြည်နယ် ရဲတပ်ဖွဲ့၊ ပြည်နယ်ရဲမှူးကြီး စိန်လွင်၏ ကိုယ်ရေးအရာရှိက ပြောသည်။

ဘုန်းတော်ကြီးကျောင်းသို့ သွားရောက်ခဲ့ရာတွင် ပါဝင်သော မြောက်ဦးခရိုင်ရဲမှူး အပါအဝင် မြို့နယ်အုပ်ချုပ်ရေးမှူး၊ မြို့မရဲစခန်းမှူးတို့ အား ဆက်သွယ်မေးမြန်းခဲ့သော်လည်း ဖြေကြားခွင့်မရှိကြောင်းသာ ပြောကြားခဲ့သည်။

“မြတန်ဆောင်ကျောင်းဆရာတော် အဖမ်းခံထားရတာနဲ့ ပါတ်သက်ပြီးတော့ မနက်ဖြန် ဆန္ဒထုတ်ဖော်မှုလုပ်တဲ့အခါမှာ  တရားမဝင်အ သင်းတွေရဲ့ အမည်နာမတွေကို ထည့်သွင်းတောင်းဆိုမှုတွေ မလုပ်ဖို့အတွက်  ကျွန်တော်တို့ကို ဒီနေ့ည နေပိုင်းမှာ ရခိုင်ပြည်နယ်ရဲ မှူးကြီးပါဝင်တဲ့ ရဲတပ်ဖွဲ့က လာပြီးသတိပေးမှုတွေ လုပ်ခဲ့ပါတယ်။”ဟု ရခိုင်အမျိုးသားပါတီ (မြောက်ဦး) အတွင်းရေးမှူး ဦးထွန်းနေဝင်း ကပြောသည်။

ဧပြီလ ၁၀ ရက်နေ့က ကျရောက်ခဲ့သည့် AA တပ်ဖွဲ့၏ ၈ နှစ်မြောက် တပ်ဖွဲ့စည်းခြင်း အထိမ်းအမှတ်နေ့ကို ဂုဏ်ပြု သောအားဖြင့် မြောက်ဦးမြို့ မြတန်ဆောင်ဘုန်းတော်ကြီးကျောင်းတွင်  “ရခိုင့်တပ်မတော်နေ့၊ ရခိုင့်တပ်မတော်ဖလား” ဘောလုံးပြိုင်ပွဲအား ကျင်းပပြုလုပ်ခဲ့သောကြောင့် ကျောင်းထိုင်ဆရာတော် ဦးနန္ဒသာရနှင့် ကိုခိုင်နီမင်းတို့မှာ ဧပြီလ ၉ ရက်နေ့က ဖမ်းဆီးခံခဲ့ရသည်။
၎င်းတို့အား ပြန်လည်လွတ်မြောက်နိုင်ရေး AA ထောက်ခံသူများမှ ဆန္ဒဖော်ထုတ်ပွဲများကို ပြုလုပ်ရန် စီစဉ်နေကြသည့် အတွက် ရခိုင်ပြည်နယ်ရဲတပ်ဖွဲ့မှ ယခုကဲ့သို့ လာရောက်သတိပေးခဲ့ခြင်း ဖြစ်သည်။

ဓါတ်ပုံ – မင်းမျိုးနွယ်/ RiA

Related Post

Comments

comments

    Related Post

  • Latest Issue

  • Sound Cloud

Root Agency