သိမ်းဆည်းထားသည့် လယ်မြေများအား ပြန်လည်ပေးအပ်မှု မပီပြင်ဟုဆို

By မင်းမျိုးနွယ် | Posted on May 19, 2017 | Also posted in News, North Rakhine | | Tagged , , , , , , , |

117 Views

_DSC0016
စစ်တွေ၊ မေ ၁၉ ရက်။ ရခိုင်ပြည်နယ်အတွင်းမှ သိမ်းဆည်းထားခဲ့သည့် လယ်ယာမြေများအား ပြီးခဲ့သည့် ၂၀၁၂ ခုနှစ်မှ စတင်ကာ ပြန်လည် ပေးအပ်မှုများရှိနေခဲ့သော်လည်း အစိုးရ၏ဆောင်ရွက်မှုများမှာ ပီပြင်မှုမရှိကြောင်း ရခိုင်ပြည်နယ် တောင်သူလယ် သမားသမဂ္ဂ အထွေထွေအတွင်းရေးမှူး ဦးကျော်ဇံက ပြောသည်။

လက်ရှိတွင် ရခိုင်ပြည်နယ်အတွင်းမှ သိမ်းဆည်းထားရှိသည့် မြေများမှာ တပ်မတော်နှင့် ဌာနဆိုင်ရာ အသီးသီးတို့၏ လက်ထဲတွင် ရောက်ရှိနေခဲ့ပြီး ယင်းမြေများအား နိုင်ငံတော်မှ ပြန်လည်ပေးအပ်သည့်အချိန်တွင် အမှန်တကယ် ပိုင်ဆိုင်သည့် မူလပိုင်ရှင်များဖြစ်သော တောင်သူများလက်သို့ ပြန်လည်ရောက်ရှိခြင်းမရှိဘဲ ပျောက်ဆုံးနေခဲ့ကြောင်း လည်းသိရသည်။

“၂၀၁၂ ခုနောက်ပိုင်းမှာ လယ်ယာမြေဥပဒေပေါ်လာတယ်။ အဲဒီနောက်မှာတော့ လယ်ယာမြေနဲ့ အခြားမြေများ သိမ်းဆည်းခြင်း စိစစ်ရေးကော်မတီဆိုပြီးတော့ ဖွဲ့စည်းလိုက်တယ်။ ကော်မတီက ဖြေရှင်းတာတွေကို ကျွန်တော်တို့ ကြားတယ်။ ဒါပေမယ့် မြေပြင်မှာတော့ ပြန်ရနိုင်တဲ့အခြေအနေတွေ မတွေ့ရဘူး။ အစိုးရကလည်း သိမ်းဆည်းခံ မြေတွေကို ပြန်ပေးပြီးပြီလို့ ပြောတယ်။ လက်တွေ့မှာတော့ ပီပြင်တဲ့အနေအထားမတွေ့ရသေးဘူး။”ဟု သကဆိုသည်။

ရခိုင်ပြည်နယ်အတွင်းမှ သိမ်းဆည်းထားသည့် လယ်မြေဧကပေါင်း ၂၈၀၀၀ ကျော်ရှိကြောင်း ယင်းမြေများအား ပြန်လည်ပေးအပ် ထားပြီးဖြစ်ကြောင်း ထုတ်ပြန်ထားသော်လည်း တောင်သူများအနေဖြင့် မိမိပိုင်ဆိုင်သည့်မြေများအား ပြန်လည်ပိုင်ဆိုင်ခွင့်နှင့် လုပ်ကိုင်ခွင့်မရရှိသေးကြောင်း ဦးကျော်ဇံကပြောသည်။

“မပီပြင်ဘူးဆိုတာက တောင်သူတွေလက်ထဲကို ပြန်ရောက်လာတဲ့ မြေတွေကို ကိန်းဂဏန်းအားဖြင့် တိတိကျကျမတွေ့ရသေးဘူး ခင်ဗျား။ ဘယ်သူကရထားပြီ။ ဘယ်သူကဖြင့် ပြန်ရနိုင်တဲ့အနေအထား မရှိသေးဘူး ဆိုတာ မတွေ့ရဘူး။”ဟု ဆက်လက်ပြောကြား ခဲ့သည်။

ယင်းသို့ ပေးအပ်ထားပြီးဖြစ်သည့်မြေများ တောင်သူများလက်သို့ ပြန်လည်အပ်နှံမှု မရှိသေးခြင်းမှာ ဒေသအာဏာပိုင်များအကြား အချင်းချင်းလှည့်ပါတ်ထားခြင်းဖြစ်ကြောင်း ၎င်းကဆိုသည်။

ထို့အပြင် ရခိုင်ပြည်နယ်အတွင်းမှ သိမ်းဆည်းထားသည့် မြေဧကပေါင်း ၂၈၀၅၀ ဒသမ ၃၆၃ ဧက ရှိကြောင်း အစိုးရကဖော်ပြသည့် ကိန်းဂဏန်းများမှာ တပ်မတော်ကသိမ်းဆည်းထားသည့်မြေများသာဖြစ်ပြီး ကျန်ဌာနဆိုင်ရာ များနှင့် ပုဂ္ဂလိသိမ်းဆည်းထားသည့် မြေများမပါရှိကြောင်းလည်း သိရသည်။

ဓါတ်ပုံ – မင်းမျိုးနွယ်/RiA

mm
မင်းမျိုးနွယ်သည် ၂၀၀၈ ခုနှစ်မှ စတင်ကာ 7 Day News သတင်းဂျာနယ်၊ Flower News တို့တွင် အလွတ်တန်း သတင်းထောက်အဖြစ် လုပ်ခဲ့ပြီး Favourite သတင်းဂျာနယ်နှင့် ထိုင်းနိုင်ငံအခြေစိုက် Arakan Review အင်လိုင်း သတင်းဌာန၌ လက်ထောက် အယ်ဒီတာအဖြစ် လုပ်ကိုင်ခဲ့သည်။

၂၀၁၃ ခုနှစ်တွင် အာရှအလင်းဂျာနယ်၊ Street Views သတင်းဂျာနယ်တို့တွင် သတင်းထောက်အဖြစ် လုပ်ကိုင်ခဲ့ပြီး သဘာဝသယံဇာတ၊ ရေအရင်းအမြစ်၊ သစ်တောနှင့် နယ်စပ်စီးပွားရေးသတင်းများကို ရေးသားခဲ့သည်။

Related Post

Comments

comments

Root Agency