ရခိုင်စည်ပင်ဝန်ကြီး ဦးမင်းအောင် ရာထူးပြောင်းရွေ့နိုင်ဖွယ်ရှိ

By Admin | Posted on January 9, 2018 | Also posted in News, Politics | | Tagged , |

284 Views

Min Aung

အောင်အောင်ထူး/RiA

စစ်တွေ၊ ဇန်နဝါရီ ၉ ရက်။ တိုင်းဒေသကြီးနှင့် ပြည်နယ် ၃ ခုမှ ဝန်ကြီးချုပ်တစ်ဦးနှင့် ဝန်ကြီးများကို အပြောင်းအလဲ လုပ်သွားမည်ဟု ပြည်ထောင်စုအစိုးရအဖွဲ့မှ လက်ရှိ အာဏာရပါတီ အမျိုးသားဒီမိုကရေစီအဖွဲ့ချူပ်ကို အကြောင်းကြားထားပြီး ဖြစ်ရာ ယင်းထဲတွင် ရခိုင်ပြည်နယ် အစိုးရအဖွဲ့ ပြောရေးဆိုခွင့်ရှိသူ၊ စည်ပင်ဝန်ကြီး ဦးမင်းအောင်လည်း ပါဝင်လာနိုင်ဖွယ်ရှိနေသည်။

ပြောင်းရွေ့နိုင်ဖွယ်ရှိသူများထဲတွင် လက်ရှိ နုတ်ထွက်စာတင်ထားသည့် ဧရာဝတီတိုင်းဒေသကြီး ဝန်ကြီးချုပ် ဦးမန်းဂျော်နီနှင့် ဝန်ကြီး ၁ ဦး၊ မကွေးတိုင်းဒေသကြီးမှ ဝန်ကြီး ၂ ဦးနှင့် ရခိုင်ပြည်နယ်အစိုးရအဖွဲ့ဝင်တစ်ဦးဖြစ်သည့် စည်ပင်ဝန်ကြီး ဦးမင်းအောင်တို့ ဖြစ်နိုင်ဖွယ်ရှိသည်ဟု တို့ပါဝင်နိုင်ခြေရှိကြောင်း အမျိုးသားဒီမိုကရေစီအဖွဲ့ချုပ်မှ ထိပ်ပိုင်းခေါင်းဆောင် ဦးဥာဏ်ဝင်း၏ ပြောကြားချက်ကို ကိုးကား၍ ယနေ့ ဇန်နဝါရီလ ၉ ရက်နေ့ ရက်စွဲဖြင့် 7 Day Daily သတင်းက ဖော်ပြခဲ့သည်။

ရခိုင်ပြည်နယ်စည်ပင်ဝန်ကြီး ဦးမင်းအောင်ကို တာဝန်မှ ရပ်စဲရန် ဇန်နဝါရီလ ၂ ရက်နေ့က ရခိုင်ပြည်နယ် လွှတ်တော်တွင် ပြည်နယ်လွှတ်တော် ကိုယ်စားလှယ် ၄၅ ဦးက မဲခွဲ ဆုံးဖြတ်ခဲ့ခြင်းဖြစ်သော်လည်း နိုင်ငံတော်သမ္မတမှ အတည်ပြုလက်မှတ် ရေးထိုးထုတ်ပြန်ခြင်း မရှိသေးသဖြင့် အဆိုပါ ပြောင်းရွေ့သူများ စာရင်းတွင် ပါဝင်လာနိုင်ဖွယ်ရှိသည်ဟုလည်း မြန်မာနိုင်ငံရေးအသိုင်းအဝန်းက ခန့်မှန်းနေကြခြင်း ဖြစ်သည်။

ဝန်ကြီးချုပ် တစ်ဦးအပါအဝင် ဝန်ကြီးချုပ်များ အစားထိုးပြောင်းလဲမည့် ကိစ္စနှင့်ပတ်သတ်၍ ပြည်ထောင်စုအစိုးရအဖွဲ့မှ အမျိုးသားဒီမိုကရေစီအဖွဲ့ချုပ်သို့ အသိပေးထားကြောင်း ဦးဥာဏ်ဝင်းက ထိုသို့ပြောဆိုထားသော်လည်း နိုင်ငံတော် သမ္မတ ရုံးမှ ပြောရေးဆိုခွင့်ရှိ ပုဂ္ဂိုလ်တစ်ဦးဖြစ်သည့် ဦးဇော်ဌေးကမူ ထိုကဲ့သို့ကိစ္စရပ်များအား အစိုးရသက်တမ်းတစ်လျှောက်တွင် တစ်ကြိမ်တစ်ခါမျှ ထုတ်ဖော်ပြောဆိုလေ့မရှိကြောင်း 7 Day Daily သို့ တုံ့ပြန်ဖြေကြားထားသည်ကို တွေ့ရသည်။

ယခုဇန်နဝါရီလ ၈ ရက်နှင့် ၉ ရက်နေ့တို့တွင် ပြုလုပ်လျှက်ရှိသည့် ဗဟိုဘဏ္ဍာရေးကော်မရှင် အစည်းအဝေးနှင့် စီမံကိန်း ကော်မရှင်အစည်းအဝေးအား တက်ရောက်ရန် တိုင်းနှင့်ပြည်နယ်အသီးသီးမှ ဝန်ကြီးချုပ်များနှင့် ပြည်နယ်လွှတ်တော် ဥက္ကဌများသည် နယ်ပြည်တော်သို့ ရောက်ရှိနေပြီး မည်သည့်ဆုံးဖြတ်ချက်များကို ချမှတ်နိုင်ခဲ့ကြောင်း တစ်စုံတစ်ရာဖြေကြားထားသည်ကိုမူ သတင်းမီဒီယာများမှ ဖော်ပြထားခြင်း မရှိသေးချေ။

ယင်းအပြင် အစိုးရအဖွဲ့ဝင် ဧရာဝတီတိုင်းဒေသကြီး ဝန်ကြီးချုပ်မှအပ အခြားဝန်ကြီးအချို့ ပြောင်းလဲမည့်ကိစ္စကို NLD ပါတီထိပ်ပိုင်း ခေါင်းဆောင်များမှ သုံးသပ်ထားခြင်းသာဖြစ်ပြီး  မည်သူ တစ်ဦးတစ်ယောက်ကမျှ သေချာကြောင်း အတည်ပြုပြောဆို ထားခြင်းမဟုတ်ပါ။

ဓာတ်ပုံ – RiA

Related Post

Comments

comments

Root Agency