ဒီဇင်ဘာက ပေးသော သင်ခန်းစာ

By Admin | Posted on January 19, 2018 | Also posted in Editorial, Opinion | | Tagged |

261 Views

၂၀၁၈ ခုနှစ် ဇန်နဝါရီလထုတ် အတွဲ (၃)၊ အမှတ် (၁) The Root Magazine မှ အယ်ဒီတာ အာဘော်ဖြစ်ပါသည်။

 

editorial

 

နှစ်သစ်တစ်ခု ကူးခဲ့ပြန်ချေပြီ။ တာဝန်တစ်ခုကျေပွန်၍ တာဝန်သစ်တို့ကို ဆက်ခံသည့် နှစ်သစ်ကူးကာလကို လူတိုင်းက ပျော်ရွှင်စွာ ဖြတ်သန်းလိုကြသည်သာ။ သို့ရာတွင် ရခိုင်ပြည်နယ်သားတို့အနေနှင့် ထို ပျော်ရွှင်မှုနေ့ရက်များကို ရောက်တိုင်း ငြင်းခုံမှု ဖြစ်ကြရသည်။

ရာစုနှစ် ၂ ခုကျော်က ရခိုင်တို့၏ အချူပ်အခြာအာဏာကျဆုံးခဲ့ရသော လရာသီဖြစ်သဖြင့်လည်း ဝမ်းနည်း ပူဆွေးကြရသည်။ တချို့ကား ပျော်ရွှင်ကြသည်။ တချို့ကား ပူဆွေးကြသည်။ ပူဆွေးသူတို့ကို ရှေးရိုးစွဲသူများ၊ ခေတ်မမီကြသူများဟု ဆိုကြသလို ပျော်ရွှင်ကြသူတို့ကို ရခိုင်သားမပီကြသူများဟုလည်း ဆိုကြသည်။ ဤသို့ပင် နှစ်သစ်ကူးတိုင်း ရခိုင်တို့ ငြင်းခုံနေကြရသည်မှာ လပေါင်းများစွာ၊ နှစ်ဒါဇင်ပေါင်း မြောက်မြားစွာ၊ နေ့ရက်တို့ ကုဋေကုဋာရှိခဲ့ပြီ။

ဒီဇင်ဘာနှင့် ဇန်နဝါရီ လရာသီတို့သည် ပုံစံတစ်ခုဖြင့် ရေတွက်သော် ဝေးသည်ဟု ထင်ရသော်လည်း နီးလွန်းသည်ဟုလည်း ထင်ရသည့် လ နှစ်ခုဖြစ်သည်။

ထို လ နှစ်ခုက အစပြုခဲ့သော ရခိုင်တို့၏ အဖိနှိပ်ခံရမှုများမှသည် ယနေ့တိုင် မငြိမ်းနိုင်သေး။

အရပ်သား ဒီမိုကရေစီအစိုးရအဖြစ် မြန်မာနိုင်ငံ၏ အုပ်ချူပ်ရေးပုံစံကို ပြောင်းလဲလာချိန်တွင်တော့ ငြိမ်းနိုင်မည်ဟု ရခိုင်သားတိုင်း မျှော်လင့်ခဲ့ကြဖူးသည်။

နိုင်ငံရေးပါတီထူထောင်၍ ရခိုင်ပြည်နယ်၏ ကံကြမ္မာကို နိုင်ငံရေးဖြင့် ပြောင်းလဲပစ်ဖို့ ရခိုင်ပြည်နယ်သားတိုင်း မဲပုံအောခဲ့မှုများသည် ထင်သလို ဖြစ်မလာသည့်အခါ ဒီဇင်ဘာလရာသီကို အတိုးချ၍ မုန်းချင်လာကြသည်။

ဒီဇင်ဘာကပေးသော သင်ခန်းစာကို ရခိုင်ပြည်နယ်သားတို့ ကြေညက်ချင်နေကြပြီ။ သို့သော် ဇန်နဝါရီမှသည် ဒီဇင်ဘာသို့ အခေါက်ခေါက်အခါအခါ ရောက်ခဲ့၊ ကုန်ဆုံးခဲ့၊ ကျော်လွန်ခဲ့ပြီးသော်လည်း ရခိုင်သားတို့၏ ဘဝကား တောက်ပြောင်လာခြင်း မရှိနိုင်သေး။ အရောင်ပြယ်မှိန်နေဆဲပင်။

နှစ်ဟောင်းကုန်၍ နှစ်သစ်သို့ ကူးကြရာတွင် လူတိုင်း၌ တူညီသော အလေ့အကျင့် ရှိကြတတ်သည်။ ထိုအရာကား လွန်ခဲ့သော နှစ်၏ အဖြစ်အပျက်တို့ကို ဆင်ခြင်သုံးသပ်၍ နှစ်သစ်တွင် ရည်မှန်းချက်သစ်၊ နေထိုင်မှုပုံစံသစ်၊ စိတ်ကူးသစ်တို့ဖြင့် ဖြတ်သန်းဦးမည်ဟု တွေးတောကြသည့် အလေ့အကျင့်ပင်။

၂၀၁၇ ခုနှစ်၏ ဒီဇင်ဘာကို ချူပ်ရမည်ဆိုလျှင် ရခိုင်တို့၏ တန်ခိုးဟု တင်စားကြသည့် ရခိုင်အမျိုးသားပါတီ အစိပ်စိပ်အမွှာမွှာ ပြိုကွဲခဲ့သည်။ လွှတ်တော် သုံးရပ်တွင် တင်ခဲ့သမျှသော ရခိုင်ပြည်နယ်၏ ဆူပါပါဝါများ၏ အဆိုမှာ ဘေးချိတ်ခံခဲ့ရသည်။ ပြည်ထောင်စု အစိုးရ၏ ယုံကြည်မှုကိုလည်း မတည်ဆောက်နိုင်၊ ပြည်နယ်အစိုးရ၏ ယုံကြည်မှုကိုလည်း မတည်ဆောက်နိုင်၊ ကမ္ဘာကြီး၏ ယုံကြည်မှုကိုလည်း မတည်ဆောက်နိုင်၊ ရခိုင်အချင်းချင်းကြား ယုံကြည်မှုကိုလည်း မတည်ဆောက်နိုင်ခဲ့။

သံသယဝင်ခံနေရဆဲ၊ အသိဥာဏ်မဲ့သူတို့အဖြစ် ပုံဖော်ခံနေရဆဲ၊ လူသတ်သမားတို့သဖွယ် ပုံဖော်ခံနေရဆဲ၊ ကမ္ဘာ့အမှိုက်များအဖြစ် စွပ်စွဲခံနေရဆဲ။

ထိုထိုသော မျက်လုံးများကို နားလည်အောင် ရှင်းပြမည့်သူကို ရခိုင်ပြည်နယ်သားတို့ ရှာဖွေနေဆဲ။ သို့သော် မတွေ့နိုင်သေး။ ရခိုင်ပြည်နယ်သားတို့သည် ခေတ်အဆက်ဆက်တိုင်းတွင် တာဝန်ကျေခဲ့ကြသည်။ ခေါင်းဆောင်ကို ချစ်၍ ခေါင်းဆောင်ကို တန်ဖိုးထားခဲ့ကြသည်။ ခေါင်းဆောင်တို့ကား ခေါင်းဆောင်မှုအတတ်ပညာကို မကြေညက်ကြ။ ဤသို့ဖြင့် ဒီဇင်ဘာလကို ရောက်တိုင်း ရခိုင်ပြည်နယ်သားတို့သည် အတိတ်ကို လွမ်းလာကြသည်။ အတိတ်၏ ခမ်းနားခဲ့မှုများကို တောင့်တကြသည်။ အတိတ်က စစ်နိုင်ခဲ့သော၊ ပြည်ကို သာယာဝဖြိုးအောင် စွမ်းဆောင်ခဲ့သော သူတို့ ဘုရင်များကို ပြန်လိုချင်လာကြသည်။

ဒီဇင်ဘာသည် ရခိုင်ပြည်နယ်သားတို့အတွက် အောက်မေ့နိုင်ဖွယ်မရှိသည့် လရာသီ။ ထို လရာသီ၏ အတိတ်ဆိုးများကို ဆေးကြောဖို့ နည်းမှန်လမ်းမှန်ဖြင့် သွားသင့်ချေပြီ။

Comments

comments

    Related Post

  • Latest Issue

  • Sound Cloud

Root Agency