ကိုးကွယ်ယုံကြည်မှုကို အသုံးချကာ စာခိုးချခွင့် ရရှိတော့မည်မဟုတ်

By Admin | Posted on February 17, 2018 | Also posted in News | | Tagged , , |

273 Views

Education Office Sittwe Rakhine state

အောင်အောင်ထူး/RiA

စစ်တွေ၊ ဖေဖေါ်ဝါရီ ၁၇ ရက်။ နည်းလမ်းမျိုးစုံဖြင့် ခိုးချစာ ထည့်သွင်းယူဆောင်လာမှုကို တားမြစ်ရန် ကိုးကွယ်ယုံကြည်ရာ အဆောင် လက်ဖွဲ့နှင့်၊ ဘုရားရုပ်ပွားတော် (ဓာတ်ပုံ) ငယ်များကို စာမေးပွဲခန်းအတွင်းသို့ ယူဆောင်ခွင့်မပြုတော့ကြောင်း မြန်မာနိုင်ငံ စာစစ်ဦးစီးဌာနမှ ထုတ်ပြန်သည်။

ယခင် တက္ကသိုလ်ဝင်တန်း စာမေးပွဲ စစ်ဆေးစဉ်ကာလများက ကျောင်းသားအချို့မှာ ၎င်းတို့ ယုံကြည်ရာ ဘာသာရေး သင်္ကေတများကို ယူဆောင်ခွင့်ရှိခဲ့သော်လည်း ထိုနည်းလမ်းကို အသုံးပြုကာ စာခိုးချမှုများ ရှိခဲ့သည်ဟု စိစစ်တွေ့ရှိခဲ့ပြီး ယခုလို ထုတ်ပြန်လာခြင်းလည်း ဖြစ်သည်။

ထုတ်ပြန်ချက်သည် မြန်မာတစ်နိုင်ငံလုံးရှိ စာစစ်ဌာနအားလုံးသို့ ညွှန်ကြားထားခြင်း ဖြစ်သော်လည်း ရခိုင်ပြည်နယ် အစိုးရအဖွဲ့အနေနှင့်မူ ပညာရေးဌာန၏ အဆင့်ဆင့် တာဝန်ရှိသူများနှင့် ညှိနှိုင်း ဆောင်ရွက်ပြီးမှသာလျှင် ထိုညွှန်ကြားချက်ကို အကောင်ထည်ဖော်ရန် ဆုံးဖြတ်ထားသည်ဟု ဆိုသည်။

“ဝန်ကြီးကတော့ ခရိုင်ကြီးကြပ်ရေးမှူး၊ မြို့နယ်ပညာရေးတွေအားလုံးကို ခေါ်ပြီးတော့ ညှိနှိုင်းပြီးပြောမယ်လို့ ပြောတယ်။ အခုကနေပြောရင် သိပ်စောသေးမယ်တဲ့။”ဟု ရခိုင်ပြည်နယ်ပညာရေးမှူးရုံး လက်ထောက် ညွှန်ကြားရေးမှူး ဦးစိန်ထွန်းလှက RiA သို့ ပြောသည်။

ညှိနှိုင်းဆွေးနွေးမှုကို စစ်တွေမြို့၌ မတ်လ ၂ ရက်နေ့တွင် ပြုလုပ်မည် ဖြစ်သည်။

စာစစ်ဦးစီးဌာန၏ ထုတ်ပြန်ချက်တွင် စာမေးပွဲဖြေဆိုရန် လိုအပ်သည့် ဘောလ်ပန်၊ ခဲတံ၊ ပေတံ အစရှိသည့် ကိရိယာများကိုသာ ယူဆောင်ခွင့်ပြုမည်ဖြစ်ပြီး ဘုရားရုပ်ပုံအပါအဝင် အင်းအိုင်လက်ဖွဲ့၊ ဂါထာမန္တရားတို့ ရေးသားပါဝင်သော ရုပ်ပုံများ၊ သင်္ကေတများကို ယူဆောင်ခွင့်မပြုဟု သိရသည်။

ထိုညွှန်ကြားချက်နှင့် ပတ်သက်၍ တက္ကသိုလ်ဝင်တန်းစာမေးပွဲဖြေဆိုမည့် ကျောင်းသားတချို့ကမူ ၎င်းတို့၏ ယုံကြည်ကိုးကွယ်မှုအပေါ် စာစစ်ဌာနမှ ကန့်သတ်လာခြင်းအား စိတ်ပျက်မိသည် ဆိုသော်လည်း ဤနည်းလမ်းကို အသုံးပြု၍ ခိုးချသော ကျောင်းသားများအပေါ် ပြစ်တင်ကြသည်။

“ကိုယ့်ဘာသာကို ကိုးကွယ်တဲ့အတွက် ယူတာလေ။ အဲဒါကို မယူရဘူးဆိုတော့ မဖြစ်သင့်တဲ့ကိစ္စပဲ။ အဲဒီထဲမှာ မသာမာတွေ ယူတာတယ်ဆိုရင်တော့ တစ်မျိုးလေ။ မသမာသူရှိသလို။ သမာသူတွေလည်း ရှိမှာပေါ့။”ဟု တက္ကသိုလ်ဝင်တန်း စာမေးပွဲဖြေဆိုမည့် စစ်တွေမြို့ မင်းဂံရပ်ကွက်မှ ကျောင်းသား မောင်ဘခင်က RiA သို့ ပြောသည်။

ပြီးခဲ့သည့် ပညာသင်နှစ်အတွင်း ရခိုင်ပြည်နယ်၏ တက္ကသိုလ်ဝင်တန်းစာမေးပွဲကို ကျောင်းသားဦးရေ ၃၈၄၄၀ ဦးဖြေဆိုခဲ့ရာ ၆၅၉၈ ဦးသာအောင်မြင်သည့်အတွက် ပြည်နယ်နှင့် တိုင်းဒေသကြီးများထဲတွင် ရခိုင်ပြည်နယ်သည် အောင်ချက်ရာခိုင်နှုန်း အနိမ့်ဆုံးဖြစ်ခဲ့သည်ဟု စာစစ်ဦးစီးဌာန၏ ထုတ်ပြန်ချက်အရ သိရသည်။

ယင်းသို့ ကျဆင်းမှုသည် မသာမသော နည်းလမ်းဖြင့် စာမေးပွဲဝင်ရောက်ဖြေဆိုမှုများကို တင်းကြပ်လာ၍ခြင်းဟု ပြည်နယ်ပညာရေးဌာနက ဆိုသည်။

လာမည့် မတ်လ ၁၂ ရက်နေ့တွင် စစ်ဆေးမည့် တက္ကသိုလ်ဝင်တန်း စာမေးပွဲတွင် ရခိုင်ပြည်နယ်အတွင်းမှ ဝင်ရောက်ဖြေဆိုမည့် ကျောင်းသားဦးရေ ၄၄၆၀၃ ဦးရှိကြောင်း ပြည်နယ်ပညာရေးမှူးရုံးမှ သတင်းထုတ်ပြန်ထားသည်။

Comments

comments

    Related Post

  • Latest Issue

  • Sound Cloud

Root Agency